منوعات

10 نصائح يجب مراعاتها قبل شراء أثاث منزلك‎

متابعينا الاعزاء النهاردا هنتكلم باذن الله عن موضوع مهم جدا  وهو

ازاى اشترى الموبيليا ؟

ويعد شراء الموبيليا عملية مهمة وصعبة معظمنا يمر بها، وفيه ناس كتير بتقع فى مشاكل بسبب ان معندهمش خبرة في الموضوع ده، بس احنا هنقولك على بعض المعلومات اللى لازم تعرفهم قبل ماتشترى :

1. حدد مساحة المكان الأول

  والمساحة بتتحكم فى نوع الاثاث وحجمه، يعنى المساحة الصغيرة مينفعش معاها الأثاث الكلاسيكي أو اللى فيه شغل كثير، يُفضل الأثاث الحديث «مودرن» علشان بيدى إحساس بالبساطة والإتساع.

2. حط ميزانية للقطع الى عايز تشتريها،

علشان متشتريش قطع غالية وتخلص عليها الميزانية وبعدين تكتشف انك لسه مجبتش حاجات كتير. ممكن تنزل تلف فى المعارض او تدور على النت عشان تعرف متوسط الأسعار وتعمل ميزانية مبدئية تشتغل عليها.

3. اسأل عند اكتر من واحد قبل ما تاخد القرار

وشوف حاجات كتير علشان متشتريش حاجة وتندم بعد كدة لو لقيت حاجة أحسن منها، ومتخليش تركيزك على اسم اللى بتشترى منه، ركز دايما على الجوده والسعر  واسأل كمان لو فيه شحن لحد البيت عشان متوجعش دماغك في النقل ودا غير تكلفتة.

قد يهمك أيضاً الأطلاع على:  هل تعلم أن الدواء له تاريخ صلاحية آخر

4. اسأل على الخامات اللى معمول منها العفش،

اوض النوم،الاطفال، النيش، الدواليب، سطح الترابيزات، المكاتب والسفرة بيتصنعوا من الخشب الكونتر. والكونتر يعتبر من الخشب المُصنَع على عكس  الخشب الزان والموسكى والأرو اخشاب طبيعية. والأنواع الأفضل بالترتيب من وجهة نظرنا هى (الكونتر الطبقات – جود وود – وطنية – فنية) ولو خبطت على الخشب ولقيت صوت مكتوم ده دليل على ان الخشب  دا كويس.

5. خشب الرُكن والأنتريهات

يفضل يكون من نوع الزان الأحمر، والزان الأحمر الموجود في مصر فيه منه أنواع والأفضل بالترتيب التالى(الروماني – AB – BC- الكلف) ويفضل يكون السمك مش اقل من 4 سم.

6. كثافة السفنج في الركن والأنتريهات

كل ما بتزيد كل ما هيزيد المدة اللى ممكن يهبط فيها السفنج، وتقدر تعرف السفنج اللى كثافته عالية لما تضغط عليه بصباعك مش هيسيب مكان وهيرجع بسرعة على عكس السفنج اللى كثافته قليلة هياخد وقت وهيعلم وفي كل الأحول هتحتاج يكون فوق السفنج طبقة او طبقتين من الفيبر علشان يبقى مُريح. وخلى بالك ان المخدات لازم تكون فيبر 100%.

7. المِجرى الخاصة بالادراج

فيها اكتر من نوع بس المنتشر (المرحلة الواحدة – المرحلتين – السوفت كلوز) المرحلة الواحدة الدرج مش بيطلع بكامل حجمه على عكس المرحلتين. اما السوفت كلوز فهو زي المرحلتين بس ممكن بلمسة واحده يقفل وكمان بيجي في الأخر ويقفل ببطء من غير ما يخبط ولا يعمل صوت.

8. سُمك الزجاج

 لابد انه ميقلش عن 8 ملي، وبالنسبة للرخام فكل لون بيفرق عن التاني، بس بشكل عام ارخص الأنواع هي الأصفر والرمادي والأحمر المنقط والأفضل منهم هو الأخضر. وافضل نوع رخام هو الأسود المنقط ذهبى او فضى.

قد يهمك أيضاً الأطلاع على:  بعض الحقائق في علم النفس

9. لو هتعمل حاجة عمولة

شوف نجار انت واثق فيه واتفق على كل حاجة الأول وحاول تشرح اللى انت عايزه بالتفصيل علشان ميحصلش سوء تفاهم بعدين. ولو هتشترى جاهز امشى على الخطوات اللى قولناها وممكن تقرأ اكتر فى مكان تانى. ولو حاسس ان الموضوع لسه صعب عليك ممكن تاخد نجار معاك هيبقى فاهم اكتر، بس لازم يكون ثقة علشان ممكن يظبط مع صاحب المعرض وياخد عمولة.

10. أخيراً اشترى الحاجات الضرورية لشقتك بس،

متجبش حاجات مش هتستخدمها وتعملك زحمة على الفاضى وتحسسك بعدم الراحة. وخليك فاكر وانت بتشترى ان دى حاجه مش هتشتريها كل يوم، يعنى لازم تجيب حاجه تعيش معاك.

ودمتم فى خير صحة وعافية متابعينا الكرام

السابق
ماذا تفعل اذا عضك كلب
التالي
 فوائد الاستحمام بالماء البارد والساخن

تعليقان

أضف تعليقا

  1. ايناس عبد التواب قال:

    الف شكرا لكم على المعلومات القيمة وربنا يرزق عباده

    1. شرفنى مرورك الكريم أستاذة إيناس ? اللهم آمين وربنا يوفق الجميع ?

اترك تعليقاً